Siit 2019 bün ik nuu in 't Fräisk Beweegen aktiif. Däi uutlöeser d'r föör was doo 'n recht trüriğ abserwäären: Mii ful up, dat up miin oller un f'râal in jungerder jorgaangen altiid minner aktiif Oostfräisk proot't word't - un sülst däient, däi 't noch beheerskernt, daunt dat hóóst bloot in d' äeng femiiljenkrais bruuken. Boovendeem is oover däi tóól läip min ferskriftelkt worden, un dat, wat föörliğt, mäist in staark ferdüütskert un mitunner ook staark fernoordleeğdüütskert skriivwiisen, wat däi äinlîik keern fan däi tóól häilundal ferslaajert. Dat móókt dat annersum ook föör minsken sünner undspreekend föörkennissen of 'n paasend umfeld baldóódiğ stur, däi tóól t' leeren.
Um d'r wat an t' daun, aarbaid ik läip süsteemóótsk: Ik neem mii oel histoorsk wellen un woordenbauken as Stürenbörğ of Doornkóót bii d' hand un gliik däi oel dóóten mit geweerslüü uut miin umfeld of. Fóók bünt dat ollerder prooters. Boovendeem dau ik ook noch meerstünniğ gespreeken mit geweerspersoonen fören, um ook däi modêern woordskat t' erfóóten. Däi soo upbaaut woordenbaukbestand dokumentäär ik d'r bii in däi Mäinskupsskriivwîis, 'n fan d' Jungfräiske Mäinskup undwikkeld standardortogróófii. Däi soo sóómelt un ferdicht't dóótenbestand löpt dan direkt in däi platföörm oostfraeisk.org, däi unnerwiilst ook 'n Oostfräisk Instituut dróógen word't.
Um dat ik nuu al gaud sööm joer up dit gebiit unnerweegens bün, kwam mii däi gedâank, 'n däil fan miin unddekkens un miin gedanken d'r tau in disser bloeğ t' däilen. Teemóótsk gaajt dat d'r bii f'râal um tóólwäitenskup un folksküen, dan miin aarbaid broch bit nuu tau näit alleniğ linguistisk erkennissen fandağ, man ook fööl folkskünnelk taufalsfuen oover oel tradisjoonen, bruuken, setrechten of handwaarkstechnikken man ook wóónglôov, hekseräj un lokóóel maarkes un fertelsels.