Fandóóeğ wil ik oover 'n oel oostfräisk weegenrecht skriiven, wat mii al fan meerder geweerspersoonen bericht't wur. Waleer was was dat wal bruuk, doo äien stüürven was un däi liiktoğt mit dat huusholt föör 't begrafnis nóó d' kâark trekken dee, dat däi nóókoomen - doo s' in 't huus fan däi ferstüürven persoon woonen bleevent - 'n weegenrecht up âal weegen, wor däi liiktoğt oover leep kriigen deedent. Sin fan dit setrecht was 't, 'n eeventuel tau leevendstiiden al ofproot't weegengebruuk föör däi nóókoomen of t' seekern. Dit recht riğt sük in 'n rîiğ fan spesjäel oostfräisk weegenrechten in. Bekentst is wal dat soo benöymt "inwiikenrecht", nóó dat elk anwooner fan 'n inwîik up bâajd siiden fan däi inwîik 'n weegenrecht taustaajt. Dat gaajt histoorsk wal up dat traajeln fan binnenskeepen t'rüeğ, föör dat 'n pad up bâajd siiden fan däi inwîik noodwendiğ was. Bekent wur dat inwiikenrecht f'râal döör 'n gerichtsoordäil uut dat joer 2008, in dat dat offisjel as oostfräisk setrecht besteediğt wur.